 |
|
|
||||||
| خواطر ونصوص الشعر و الأدب العربي هذا القسم مخصص لكل ما يختص بالجانب الشعري والأدبي حتي نزيد من قاعدتنا العلمية وتعم الفائدة على الجميع |
 |
|
|
أدوات الموضوع | انواع عرض الموضوع |
04-21-2008, 05:56 AM
|
#1 |
|
حاسبكو متابع
 
|
خالد وبندر الجزء الثاني
هنا الجزء الثاني
***************************** قعدت في فراشي استرجع اللي صار معقوله خالد يسوي معي كذا ويقول عني هالكلام, وبدون حتى ما يفكر وقدام هالعالم كلهم؟!! لا اكيد انا احلم اصلا اللي شفته اليوم انسان ما اعرفه!!!ورغم الإهانه اللي كنت احس فيها والجرح اللي في قلبي الا اني دست على مشاعري ورحت ادق عليه لازم افهم وش اللي مضايقه لهالدرجه ليش؟؟ لانه مو اي واحد لكنه للاسف عطاني مشغول بعدين قفل جواله !! جلست في بيتنا ثلاث ايام لا رحت للاستراحه كالعاده ولا استقبلت مكالمات من احد حتى اهلي مستغربين ,لكن لان طبعي كتوم ما قدروا يعرفون أي شي. كانت هاذي اول ثلاث ايام ما اشوف خالد فيها واحنا في نفس المكان مرت علي كنها ثلاث سنوات ,ورغم اللي سواه معي الا انه وحشني حيل واشتقت له ذاك الشوق اللي تحسه يوجعك مو بس نفسي الا تحس شيء يألمك من جد اذا فاهميني!!! ,لكنه الله يسامحه ما حاول يعطيني أي فرصه عشان اتصل عليه. اتصلوا الشباب من الاستراحه وكانوا حاطينه عالسبيكر وسلموا علي وسألوا عن احوالي عاد واحد منهم اسمه ماجد قال:وينك من زمان عنك يارجال كبر راسك علينا والا عشان خويلد ما عاد يجي صرت انت بعد ما تجي؟! سمعت كان احد ضربه وسكته المهم قلت:معليش ياشباب انا هاليومين ما اعتقد اني بجي للاستراحه مالي نفس سامحوني..قال سامي:وشرايك نجيك للبيت اذا ما عندك مانع؟!...استغربت بس رديت..بالعكس حياكم الله أي وقت البيت بيتكم...خلاص اذا شفنا يوم مناسب بندق عليك... خير انشاءالله الله يحييكم أي وقت...مع السلامه.. بعد شوي دق خالد!!!!!!!!معقوله ماني مصدق عيوني وش القصه؟! قعدت ساعه اطالع الأسم ابي اتأكد انه فعلا هو، لكن للاسف سويت شي بظل ندمان عليه طول عمري,عطيته مشغول وقفلت الجوال,ليش سويت كذا ما ادري اظن انها كانت ردة فعل طبيعيه بعد اللي صار لي معه وما اعتقد احد يلومني,يمكن ابي ارد له اللي سواه او كنت عارف لو رديت انه بيكون لي فضل عليه وهذا اللي ما ابيه المهم هذا اللي صار,لكن الوضع استمر صار يدق علي وانا ما ارد كنت اعاند قلبي قبل لا اعانده هو, صار يرسل مسجات يترجاني فيها اني ارد لكن اللي فهمته من بعض المسجات انه يبيني اسامحه لانه اكتشف انه غلط بحقي ومن هالكلام اللي خلى عنادي يزيد... بعد يومين دق علي طلال اخو خالد الكبير هو بعد صديق عزيز يجلس معنا من فتره لفتره فالاستراحه وكنت اغليه من غلى اخوه واحترمه كثير ولا قدرت اصفطه رغم اني عارف سبب المكالمه ورديت: مرحبا طلال... هلا وغلا وش اخبارك وعلومك يابندر؟...ابد والله تمام...انت أخبارك واخبار الأهل؟...تسلم كلهم تمام, بندر ياخوي!!.. ســــم؟ ...سم الله عدوك, انا داق عليك عشان موضوع خالد انا عارف انك ماتبي احد يتدخل فالموضوع حتى خالد مو راضي يتكلم انا عرفت من الشباب وفكرت كثير قبل اكلمك لكني ماقدرت اشوف حالة اخوي كذا واصفط يديني, الصراحه من ذاك اليوم وهو مو خالد اللي نعرفه لا يروح ولا يجي ماعاد يسولف ولا يضحك حتى الاكل دايم ما يشتهي!!والوالده ضايق صدرها عليه تحسب انه زعلان على البنت وتقول لاخواني وين بندر عنه محد بيوسع صدره الا هو!!، صار طول الوقت في غرفته خاصه لما عرف انه مالك يد فاللي صار، وليتها جت على كذا خالد رجع يدخن بعد بس هالمره بشكل يخوف يابندر...قلبي انقبض بس رديت...والله ياطلال انا مقدر موقفك وخوفك على اخوك واعرف ان قلوبكم على بعض دايم وصدقني اخر شيء اتمناه ان خالتي يضيق صدرها وانت عارف زين اني اعتبرها امي الثانيه لكن انا ما غلطت معه ابد,هو اللي جاني ونسف كل شي حلو كان بيننا في لحظه غضب... طيب ماتبي تعرف وش القصه وليش خالد سوى معك كذا؟.. مهما كانت القصه ما تعطيه الحق انه يسوي اللي سواه ترانا ماعدنا صغار وانا اخوك,بالله هاذي طريقه يعاملني فيها؟!! والله اني ما شفته يسوي كذا مع الناس اللي كان يتهاوش معهم وهو مراهق، خالد قدر يقول عني كلام يجرح بدون ما يراعي أي شي ويصدق فيني كذبه بدون حتى ما يعطيني فرصه ادافع عن نفسي...تنهد طلال.. ياخوك اللي صار ان اهل البنت قبل لا نحدد الملكه رفضوا فجأة يقولون انهم عرفوا انه يدخن او على الاقل كان يدخن ولا عندهم استعداد انهم يجازفون ,ومن ضمن الكلام فهمنا ان اللي قالهم بندر وانجن خالد لما سمع اسمك كان مصدوم وقعد يصارخ يقول كيف يسوي فيني كذا وهو وعدني؟!وطلع وصار اللي صار لكن اللي فهمناه بعدين انه طلع بندر ولد جيرانا بس تبي الصراحه ما احد من اخواني جا على باله كلنا رحنا لك على طول لما سمعنا الاسم... ضحكت بتعجب وانا اقول في قلبي "هذا الشيء التافه هو اللي خلاك تظلم خويك ياخالد؟!!"رديت على طلال...والله هذا مو ذنبي ولا هو عذر للي سواه معي خالد ظلمني وكسر في داخلي شي عمره ما يتصلح والله انه غالي وانا مسامحه ياطلال ولا ابي شيء منه بس صدقني ما اقدر --وحسيت اني ماعاد اقدر اكمل...بنبره هادئه رد طلال..على كلا انا حبيت افهمك اللي صار وانتم رجال وفاهمين وش تسوون وانا ما اقدر الومك على شيء بس هذا اخوي يا بندر ولازم احاول اسوي اي شي... اعذرني ياطلال ياليتك جيتني في شي ثاني والله رقبتي سداده ... اصيل ما تقصر يابندر اشوفك على خير...مع السلامة...لما عرفت التفاصيل ضاق خلقي زياده كنت اتمنى ان الموضوع يكون اكبر يعني معقوله يسوي كل ذاك الفصل عشان تشابه اسماء؟! شي يحز فالخاطر صراحه صحيح ان خالد معروف عنه انه عصبي ولا يقدر يضبط نفسه بس هالكلام المفروض ماينطبق علي،على الأقل مو بهالطريقه اللي صارت!!بأختصار حسيت اني مثلي مثل غيري بالنسبه لخالد... فاليوم الثاني جت الوالده تصحيني الساعه10الصبح ...يمه بندر اصحى خالد عند الباب...كنت متوقع ان هالشي بيصير وحاسب حسابه ..قولي له نايم...قلتها وانا اغطي راسي بالبطانيه..حاولت تسحبها من فوقي ... يوه اقولك خالد عند الباب وش بلاك ياولدي...على صوتي شوي... عارف انه خالد سمعتك من المره الاولى وانا اقولك نااااايم... تعجبت الوالده من تصرفي لاني اول مره اسويها لكني ما عطيتها فرصه عشان تستفسر, طلعت من غرفتي وانا نطيت من فراشي للشباك على طول, كنت اشوف سيارته لكن ماقدرت اشوفه حاولت منا ومنا مافي مجال. صار يمر على بيتنا يوميا الظهر والليل وانا اتهرب منه واصرفه ولا عمري طلعت له,ودروا اهلي ان بيني وبينه شي اصلا واضح مايبي لها ذكاء, اما جوالي صار مايسكت سواء مكالمات من خالد او من الناس اللي يحاولون يصلحون بيننا و مسجات طول الوقت حتى اذا قفلته وفتحت الثاني او سوا كان يدق عليهم على طول,ما ادري العب على مين هذا خالد اللي يعرفني زين ويعرف كل ارقامي وحتى لو كان عندي رقم محد يعرفه فهالكلام ماينطبق عليه.. ***************************** (5) ذاك اليوم اشتقت له ورجعت بي الذكريات لايام الابتدائي وياكثر المواقف اللي حصلت لنا لان اللي يصادق واحد مثل خالد تتحول حياته لمغامره، مره في الصف السادس اذا ما خاب ظني كان الاستاذ مسوي مسابقه اللي يفوز بيصير"العريف"اللي ينظم الفصل اذا ما كان الأستاذ موجود..!! والله ايام وحشتني، المهم انا كنت ميت عشان اصير هالعريف اجي بدري، واشارك، وصاير مؤدب"ثقيل دم على قولة خالد"كان مايحب الاشخاص اللي مثلي يهتمون بالدراسه ويحبون المدرسين او يتمصلحون عندهم على قولته بس سبحان اللي جمعنا مع بعض كان يقول...ليش تبي تصير عريف؟!! ترى العيال بيكرهونك..ما اهتميت لكلامه ورديت..ابي اصير كيفي!! بعدين يا غبي بخليك تطلع وتدخل على كيفك..لا مو لازم انا اسوي اللي ابي حتى لو ماكنت انت العريف...المهم قبل لا يختار الأستاذ بيومين شريت بلونات وجبتها للمدرسه، خالد كان مريض و غايب بس انا والشله رحنا ومليناها مويه واول ما انتهى الدوام رميناها من فوق وانحشنا، يمكن بتقولون وين الولد المؤدب لكن انا بعد خالد صارت تجيني طلعات، توقعت الموضوع محد بيدري عنه لكن من بكره اول ما جيت الصبح قالوا لي العيال ان الأستاذ يسأل عن اللي جاب البالونات وسوى الحركه اللي امس، هنا انا قلت على العريف السلام، هالاستاذ مايصدق، رحت لخالد اللي متجمعين عليه كل العيال بما انه كان غايب امس، علمته باللي صاير وهو يدري انا وش سويت امس لاني قلت له السالفه واحنا جايين للمدرسه، قال خلاص ولا يهمك انا اتفاهم مع الأستاذ كنت اعتمد عليه كثير، لما بدت الحصه دخل الأستاذ وبنبره كانت تخلينا ننتفض..اللي رمى البالونات امس يوقف.. محد رد فالبدايه كان ماسك مسطره وش كبرها الله يسامحه...شوفوا لو ما تكلمتوا بعاقب الفصل كله...ناظرت خالد وانا بموت من الروعه ابتسم وغمز.لي بعدين وقف ...انا يا استاذ...قالها كنه محرر القدس!!قرب الأستاذ من عنده وسحب اذنه... والله اني عارف انه ما في غيرك ياخالد يسوي هالحركات، انت متى بتعقل ليش ما تصير مثل اخوانك او مثل صديقك بندر جننتني معك ياولد!!... الصراحه ما توقعت ان خالد بيتحمل اللي صار بدالي؟؟! فعلا كنت مستغرب والدليل اني قاعد اتفرج وهو يتعاقب وانا ساكت!!طبعا الأستاذ كسر المسطره على يدينه يا حرام وانا احس ان عقلي بيطير من المنظر بعدين وداه للمدير...في نفس الحصه اختارني الاستاذ عريف وطبعا ما تهنيت فالخبر لاني ما ادري وش صاير مع خالد ذاك الوقت.. لما انتهت الحصه كان واقف قدام غرفة المشرف وحوله بعض الاولاد، يوم شافني ركض ولمني...احلىىىىىىى اخيرا وصلت اللي تبي مع وجهك...انا ما كنت اقدر اتكلم اشوف يدينه حمر من الطق ويفركها على جسمه ووجه الاسمر تخالطه حمره بسبب المرض وهو يضحك...قلت وانا متنرفز يمكن من الأحراج...خالد ليش سويت كذا انا ما قلت لك—قاطعني...يا بن الناس يعني اول مره انطق خلاص مشها يالله لازم نحفل اليوم...من بعد اللي صار عمرنا ما تكلمنا عن هالسالفه شكله نساها او ما اعتبرها شيء بس عمري ما نسيت صحيح اننا كنا صغار لكن فزعته هاذي لا يمكن انساها... هالذكريات شوقتني له و رحت اتفرج على صورنا وعلى اشرطة الفيديو ,عجبني كيف كنا مره قريبين من بعض ولا في مكان يطلع فيه واحد الا الثاني جنبه,اغلب الاشرطه ما قد شفتها من قبل كانو حوالي العشرين شريط شي لسفراتنا وشي لطلعات البر وكلها شفتها في يوم واحد ورى بعض,اكتشفت اني طول الوقت اطالع فيه هو حتى فالصور عيني عليه بس, وطوال وقت عرض الاشرطه وانا اضحك عليه كان بطبعه خفيف دم محد فهالدنيا يخليني ابتسم او اضحك اوحتى يجنني مثل ما يسوي ,واحد من الاشرطه كان فيه مقطع اثر فيني كثير كنا مخيمين فالصمان واحد من الشباب يصور ومعه خالد, مروا على اغلب الشباب, اللي ينصبون الخيام واللي ينزلون الاغراض وخالد كان ماخذ دور المقدم عشان يتهرب من الشغل كالعاده هو واللي معه وقعد يسوي مقابلات معاهم ويستهبل عليهم وانا اضحك طول الوقت على طريقه كلامه وتعليقاته لما جا دوري كنت قاعد اشب الفحم ومعطيه ظهري قرب مني...عاد جينا الحين لاغلى انسان...كنت مشغول باللي معي...هلا هلا خلود,مسوي فيها مذيع يعني؟!!ما ودك تساعدني بدال هالخرابيط ازعجت العالم ياعمي...كان يوجه كلامه للكاميرا وحاط يده على ظهري وانا مو معطيه وجه ...هالولد اللي تشوفونه عرفته من يوم احنا صغار عزيز وغالي علي ولا ابدله بكنوز الارض...قاله اللي يصور: ما اقدر انا على هالكلام!! يا بعدي هاللي انت كاشخ فيه وتمدحه من الصبح حتى ما عطاك وجه وانت تتكلم... طالعني بنظرات ما انتبهت لها ذاك الوقت كانت تحمل معاني حلوه... كمل كلامه..ولله لو ايش يصير ما يتغير شي من غلاه... تجمعت الدموع وانا اسمع كلامه مع اني ذاك الوقت واضح اني ما انتبهت لـ أي كلمه جتني مشاعر متضاربه كنت اقول في نفسي "كلام رائع لكن ماطبقته ياخالد باللي سويته فيني", سكرت الفيديو ورحت انام او بالاصح احاول انام. يوم الثلاثاء رجعت للبيت متأخر ولما وصلت عند الباب شفت سيارته, كان يستنى داخلها والله وحده اللي يدري من متى,وعلى ما يبدو لي من طريقة قعدتة وتكتيفة يدينه انه نايم لأن راسه مايل على جنب بس شكله متغير مره!! اول شي لحيته بدت تطلع,شعره تركه يطول بدون ما يرتبه وهاذي مو عادته ابد,واضح ان جسمه ضعف يعني كأنه واحد توه طالع من السجن... وقفت سيارتي لكنه ما حس ما ادري وش اللي خلاني اصفق باب سيارتي بقوه عشان ينتبه .. يمكن ما كنت ابغى انتظاره يطول،فز من نومته و نزل بسرعه ،ناداني وصوته تخالطه بحه واضحه،وخالد من النوع اللي صوته يروح بسرعه اذا صارخ او اذا صار مريض حسيت بتعبه,لكني ما التفت له وسويت روحي ما اسمع ودخلت للبيت, الرجال قعد يطق الباب زي المجنون لدرجه اني خفت يصحي الجيران ويفضحنا قدام العالم وانا واقف عنده من داخل منزل راسي واسمعه ...افتح يابندر خلني اكلمك الله يعافيك لا تسوي فيني كذا يابندر... كان كل مره ينادي فيها باسمي بصوته اللي مره تسمع الكلمه ومره ماتسمعها اتألم بس من جد ما ادري وش قوة القلب اللي جت لي فجأة وخلتني اتماسك ولا اطلع له كل ما مر الوقت زاد عنادي, بعد فتره سمعت صوت جسمه ينسحب على بابنا كنه يقعد فالارض ,رحت اركض بافتح الباب خفت انه صار له شيء,لكن سمعت صوته يكلم نفسه لانه توقع اني دخلت داخل خلاص...سامحني يا بندر انا اسف والله اسف ... وانا اسمعه كنت كني اسمع اعتذار من طفل متأكد ان اللي قدامه ماراح يسامحه, جلست على الارض وحطيت راسي بين يديني وسندت ظهري للباب من داخل , وانا افكر في نفسي"معقوله اللي قاعد يصير معنا يارب؟!!"والله دنياغريبه، وجلسنا ساكتين، بعد فتره سمعته يتحرك ويركب سيارته. بعد يومين جاني واحد من ربع الثانويه اسمه نواف كانت علاقته قويه مع خالد والى الحين وهم ربع بس هو مو من شلة الأستراحه ابتسمت اول ماشفته تذكرت على طول هباله هو وخالد ايام كانوا يرقصون سامري فالصف كانوا اجرأ اثنين وكيف جتهم تهزيئه من المدير خلتهم ينسون الرقص كله وسبحان الله وشلون تغير هالنواف وصار شيء ثاني رغم ان خالد لازال على جنونه... ماقال شيء عن الموضوع لكن جيته صدقوني كان لها اثر في نفسي ذكرتني بأشياء كثيره واظن ان هذا مقصده من الزياره.. *************************** (6) جاني مسج من خالد فاليوم الي بعده وكان مقطع من اغنيه تعجبنا ودايم نرددها يقول المسج: *ما جيت ابسأل جروح او سبه غيابي.. المشكله"اعرفـــــــك" اكثر من أسرارك.. وأكثر من جــــــــــــروح قلبي ورقه أعتابي.. ((قلي بعد هالـــــفراق وش آخر أخبارك))؟؟!! المسج اثر فيني لان خالد مو راعي مسجات ولا يعترف فيها، رجعت بي الذكرى لايامنا الحلوه وقررت ارسل له مسج كرد من نفس هالاغنيه بعد بتعديل بسيط مني: *ماهي غريبه اذوق وانطفي بنارك ولا هي بعيده اشوف الجرح باحبابي حاولت أنسى ولكن ضاعت اعذارك مادام جرحك ((يالرمت))مكتوب بكتابي!! يوم الخميس اتصل سامي:هلا بندر...فرحت بمكالمته ذكرتني بالجمعات فالأستراحه...هلاااااااااااااااا سامي وش الاخبار...تسلم, وش دعوى يارجال وين الناس اشتقنالك...تشتاقلك العافيه ياخوي...فاضي اليوم نمرك انا والشباب بين عشوين؟...الساعه المباركه حياكم الله والله ودي بشوفتكم...اجل نشوفك اليوم انشالله... لا تطولون صلوا في مسجدنا مع السلامة. جو الشباب على موعدهم على أنهم ما صلوا عندنا ورحت افتح لهم, ماشاء الله كان الكل جاي ما ادري وش الغلا اللي جا لي فجأة, ولما اكتملت المجموعة وأنا أرحب فيهم قبل لا اسكر الباب دفعه واحد فتحته بسرعة وقبل ما أشوف مين قلت..السموحه ماشفتك يـــا...كان خالد!!!ما عرفت وش المفروض تكون ردة فعلي ،لما تلاقت عيوننا بعد كل هالغيبه حسيت كني بطير من الفرحة في داخلي وأنا أحاول بكل ما اقدر إني أخفيها واني ما أنط عليه واحضنه,ابتسم ذيك الابتسامة الحلوة واللي وحشتني حيل وهو زي ماتقولون كنه واحد غرقان ورد النفس...فتح يدينه عشان يلمني لكني بكل جمود مديت يدي وصافحته بدون أي كلمه!!قبل لا يصير في خاطركم شيء علي تذكروا اللي سواه فيني وش ممكن تكون ردة فعل أي احد فيكم، فالأخير إحنا بشر ولنا مشاعرنا وانفعالاتنا اللي مو دايم لها تفسير ولا نقدر نتحكم فيها مهما كانت مكانة الشخص بالنسبة لنا.. الشباب سبقونا للمجلس,أصلا كان واضح القصد من هالزياره أكيد خالد هو اللي جابهم كلهم, توجهت للمجلس لكنه سحبني من ذراعي ناحيته بقوه, وبصوت هامس يحمل كل معاني الندم والرجا...معقولة ما وحشتك؟!!.. مارديت عليه وكمل كلامه...لمتى يابندر بتظل تتجاهلني, كلمني رد علي,هزئني اوحتى اضربني أنا راضي واستاهل لكن لا تسوي فيني كذا حرام عليك والله إني تعبان وفهمت غلطتي وعارف إني ما اقدر أعوضك لكن هالعقاب والله فوق طاقتي يكفيني يابندر انت بالذات تدري إني مالي غنى عنك...كان قلبي يقول لي...ياخي خذه بحضنك وانسوا كل هالالم لكن الله يلعن إبليس ،العناد والكبرياء سيطروا علي والموقف اللي صار فالاستراحة بين عيوني, قلت بكل برود وأنا ابعد يدينه عني بهدوء...جعل يدي تنقص قبل يجي اليوم اللي تنمد فيها عليك ماضربتك وحنا صغار تبيني أمدها الحين؟!! "كانت نغزه على حركة الأستراحه", يالله الشباب ينتظرون داخل... نزل راسه بانكسار ودخلنا, واضح إنهم كانوا يحاولون يلقطون شي من الحوار اللي دار بيننا, لكن أول ما دخلت كل واحد التفت على الثاني وسوى روحه متعمق في سالفته. بديت اصب القهوة ومسك خالد الدله الثانية,كانت هاذي عادتنا لما يزورني احد دايم نفزع لبعض بس هالمره ماكنت أبي أي مساعده منه,واللي زاد قهري إن خالد باللي صار خلانا فرجه لخلق الله ومحل شفقه الجميع وهذا اللي ماكنت استحمله..قلت لماجد أول واحد بصب له بصوت واطي وأنا اضغط على أسناني..رح قله يترك الدله ومشكور ما نبي منه شي...كملت صب وسمعت ماجد يقول لخالد اللي بدئ يصب من الجهة الثانية :هات الدله عنك...لا استرح تسلم أنا أبي اصب مع رفيقي...وشدد على آخر كلمه يبيني اسمع...لكن بمزحه بايخه وقاسيه في نفس الوقت يرد ماجد:هذا أول يالحبيب زين انه سمح لك تدخل لبيته معانا هات عنك بس...وقعد يضحك..حسيت انه جرحه وتعمد يهينه ولولا أني حكمت عقلي ذيك اللحظة وتذكرت انه في بيتي كان صفقت وجهه بالدله اللي معي,صحيح إن ماجد كان معروف عنه انه إنسان فظ ومزحه زي وجهه ولا يثمن كلمته أو حتى يفكر فيها قبل يقولها,لكن لو في ظروف غير هاذي الله العالم وش كنت بسوي فيه... هذا إذا ما أدبته أول مايطلع خالد ادري إنكم تقولون طيب هذا اللي أنت تسويه مع خالد بس ما ادري إذا قد جاكم هالشعور انه ممكن اجرح أو ازعل إنسان غالي علي بس لو احد ثاني حاول يفور دمي و اعصب!!!. المهم سويت روحي ما سمعت وكملنا صب,جلسنا, اللي يسولف واللي يضحك كنه ماصار شيء إلا أنا وخالد كنت أمر بعيوني عنده كل شوي, ولأني افهمه من عيونه وبدون أي كلمه عرفت انه ينتظر الشباب يمشون. أذن العشاء وقاموا الجماعة إلا خالد وكنت متوقع هالشي بعد, ودعتهم وشكرتهم على الزيارة, عند الباب قال لي سامي بيني وبينه:والله إنكم مفضوحين الغلا واضح بينكم حتى لو حاولتوا تبينون العكس والله الله في خالد وأنت عارف أكثر مني انه مافي مثله أنت العاقل ولا تغلط غلطته انتم بدون بعض اسمح لي ما تسوون شي, ولا تخلون شي تافه يهدم أحلى صداقه شفتها في حياتي,أصلا والله يابندر انه يحز في نفسي إني أوصيك عليه وانتم اللي من أول نخاف نقول شيء عن واحد منكم قدام الثاني...شكرته وقلت..قلبي ياسامي ما يزعل وأنت تعرف خاصة على خالد بس الأمور أحيانا تطلع من يد الواحد والله يخليك لا تفتح معي الموضوع مره ثانيه تراه علي أصعب مما تتخيلون..مع السلامة.. ودعته, ولما التفت لقيت خالد واقف عند الباب الداخلي ينتظرني, قربت عنده بدون أي كلمه وكتفت يديني, بدئ بالكلام على طول... بندر سامحني يااخوك ترى كل هاللي قاعد يصير ماله داعي, أنا تهورت وقلت كلام ماكان لازم أقوله, وجيت اليوم اعتذر لك وأحب راسك بعد,"تكفى"خل عنك العناد وريح بالي ترى ما صارت المسامح كريم يالغالي...سكت فتره أول مره اسمع تكفى منه كانت طالعه قويه منه لكني حاولت اختار كلماتي قبل لا أقوله شيء..آسف يا خالد صدقني ما اقدر أنت حطمت كل الأشياء الحلوة لك في داخلي بعد ما سمعتني ذاك الكلام وإلا نسيت؟!!إذا أنت نسيت تراي اذكر كل كلمه قلتها وتتردد في بالي كل يوم, ذاك الكلام اللي زي السم واتهمتني باطل بعد بدون ما تحسب لصداقتنا أي حساب,يا خالد أنا للحين أحس إني في حلم مو قادر اصدق اللي صار, أنت من بد كل هالعالم تبيعني أنا في لحظه؟!! ما كان العشم والله... وبصوت مليان الم ...يعني ايش يابندر 16 سنه صداقه معقول ما قدرت تلقى لي لحظه وحده تشفع لي عندك وتخليك تسامحني؟؟؟!!..بعد كلامه انهمرت الذكريات من كل جهة لكني حاولت أتجاهلها بكل ما اقدر وانفجرت... اسأل نفسك قبل لما أهنتني قدام البشرية بدون ما تعطيني حتى فرصه إني أدافع عن نفسي أنت يا خالد حتى ما حاولت انك تظن فيني خير وبعتني بسهوله, نسيت كل شي يا خلود, نسيت اللي إذا ضاقت بك الدنيا يصير لك الدار ويضيق خلقه لين تنفرج عليك, ونسيت اللي صانك وحفظ أسرارك طول عمره، نسيت اللي ما يرضى احد يغلط عليك وأنت بكل بساطه تجرحه وتظلمه وتحرجه قدام الكل, ياليتك قدرت معزتي ومحبتي الكبيرة لك, حركت يديني بعصبيه... يا خسارة يا خالد أنا بس أبي اعرف ذنبي, قلي ليش سويت معي كذا؟؟! عمري غلطت عليك بكلمه؟ أو حتى ضيقت خاطرك بحركة؟ تجرحني بهالسهوله ليه؟ علمني ياخالد لا توقف ساكت تكلم يا أخوك؟!! المشكلة هنا إن الغلطة جت من غالي وهذا اللي يخليني ما اقدر أمشيها...عضيت على شفتي وأنا أشوف ملامحه تتغير...تجاهلته وكملت...تدري وفر علي كل الكلام اللي بتقوله لأنه ما عاد ينفع شي الحين اللي انكسر ما يتصلح ما عاد لك بقلبي مكان ليتني ما عرفتك ياخالد... كنت أقول هالكلام عشان أرد له اللي صار فالاستراحة وداخلي يصرخ...يا مكبر كذبتك يا بندر أنت لو احد سألك وش دنيتك مايجي في بالك إلا أهلك وخالد... سكتنا شوي وخالد يهز رأسه وعيونه تتلامع, وألف صوت في داخلي يقول له:تراي مثلك يالغالي عزيز وداخلي منهار, وعشان انهي هالمشهد الحزين قبل لا اضعف قدامه قلت: في بيت شعر سمعته مره وما أظن إن معناه وصل لي أو يمكن المشاعر اللي وصفها إلا اليوم: الجرح لا جــا من أغراب عــــــــــــادي بس الجرح مـوت الجرح لا جا من أحباب*1 لا جا من أحباب ياخالد وأنت ياخوي ما قصرت كفيت ووفيت معي فهمتني البيت بطريقه ما أظن إلا متأكد إن ما احد يقدر يوصلها مثلك, ما ودي أقول إني نادم على الماضي لأني فعلا ما ندمت لكنك خيبت ظني فيك...رفع رأسه وقرب يده من أذنه من قسوة الكلام اللي سمعه...كافي يا بندر كافي أنا عارف انك دايس على قلبك وأنت تقول هالكلام، فإذا كنت تبي تثبت لي شي أو حتى لنفسك صدقني تراك أثبته, وإذا كنت تحس انك مخدوع فيني أو مصدوم فأنت الحين بإصرارك على الزعل تسوي مثلي ومهما صار أو بيصير ترى غلاك في قلبي هو الأول دايم وعشرتك عمرها ما تهون عندي, وبالنسبة لك أنا أكثر إنسان فاهمك في هالدنيا عشان كذا بصبر عليك شوي لكن ما راح استسلم وعارف انك مهما تقسى وتبعد طيبتك وحنية قلبك بترجعك لخو يك, وعارف بعد إني ما أهون عليك... همست وعيوني فالأرض: وش اللي يخليك متأكد لهالدرجه؟! مثل ما هنت عليك في يوم بتهون علي اليوم !!...طالعني بنظره يائسة وحزينة... الله يسامحك يابندر والله ما أظن انه يفرحك انك تجرح خويك بهالطريقه...، إذا كنت قادر تنسى وتلغي أحلى سنوات من طفولتك وشبابك فأنت بتقدر تنساني أما بالنسبة لي فانا ما اقدر استغني ولو عن لحظه من ذكريات عمري معك لأني ما اقدر أنسى حياتي كلها... رديت بسخرية واللي سويته فالأستراحه وش تعتبره؟؟مثل مانسيت اللي بيننا بسوء ظن أنا نسيته بهالجرح، و ادري انك ماتستحمل فكرة إن أي احد يزعل منك لكن أنا--...قاطعني...يابندر أنت مو أي احد وراك تكلمني كذا؟! فتح عيونك تراي خلود... فعلا أنا مو أي احد والدليل سواتك فيني...ابتسم بألم...لا حول ولاقوه إلا بالله ما توقعت العناد يوصل فيك لهالدرجه، على كل حال الموضوع الحين صار في يدك وتقدر تحكم فيه بالطريقة اللي تبي بس أتمنى انك ما تسوي شيء تندم عليه، ولا تغالط نفسك أكثر من كذا أنت تعرف من أنت بالنسبة لي وهالعالم اللي حولي بدونك ما أبيهم وما اقدر أتخيل إن اللي كان بينا بيكون ذكرى في يوم من الأيام أنت متخيل هالشيء وأنت تقول هالكلام؟!!...هزيت راسي...محد يموت قبل يومه الدنيا كذا والحمد الله على نعمة النسيان... إقامة الصلاة.. وودعنا بعض وطلع. وننتظر الجزء الثالث والمهم في آمان الله |
|
|
04-29-2008, 08:40 PM
|
#2 |
|
حاسبكو متابع
|
مشاركة: خالد وبندر الجزء الثاني
الجزء الثالث
(7) بعد هالموقف حسيت براحه كبيره, حسيت إن إحنا متعادلين الحين أو يمكن كان سبب الراحة إني تكلمت معه بعد فتره اعتبرها في نظري طويييييله وطلعت كل اللي في خاطري, أصلا ما عاد فيني صبر على فراقه وأكيد انه حس بغلطته وهذا اللي كنت أبيه وقررت إني أنسى اللي صار خلاص و أرد عليه إذا دق المرة الجايه, وأسامحه واطلب منه يسامحني بعد,يعني حتى أنا قلت كلام ما كان لا زم يطلع مني وقررت إن إحنا نسافر بعد عشان نعوض كل الأيام اللي بعدناها عن بعض. علمت ريم بالسالفة كلها كانت مستغربه وهي تسمعني:تصدق يابندر هاذي والله العالم عين وصابتكم اجل معقولة خالد يسوي اللي سواه لا والأغرب انك قويت نفسك ولا سامحته,لا لا اسمح لي هالكلام ما يدخل العقل..!! ..ضحكت وأنا اسمعها وقلت...من جدك ما سامحته؟؟!!أصلا من أول ما شفت اسمه في جوالي سامحته على طول وبيني وبينك قلبي ما قوى يزعل عليه من الأصل لكن الظاهر إني كنت امثل على نفسي قبل لا امثل على احد!! ثانيا المسألة باختصار كانت رد اعتبار, لكن تعرفين حنا مو زيكم انتم يالبنات إذا زعلت وحده الثانية تعتذر على طول غالبا والثانية بعد تسامح بسرعة وهذا في ظني اللي يخلي صداقات البنات أجمل وأطول بعد أما الشباب فالكرامة والعزة تتغلب على العواطف الثانية دايم نحس إن إحنا مو بحاجة احد والاعتذار بعد من أصعب الأشياء علينا هاذي طبيعتنا اللي حطها ربي فينا, هذا وأنا وخالد نعتبر طفرة جينية بالنسبة لصداقات الرجال ،الله يعين انشاءالله أنا الحين بس استناه يدق خلاص ماعاد فيني صبر...طالعتني بتعجب... والله انك غريب يابندر طيب ليش ما تدق أنت عليه؟!!...اوووه أنت غبية وإلا تتغيبين وش قاعد أتفلسف عليك من الصبح, أقول لك ما اقدر صعبه علي وبعدين خلود ما يقدر يصبر بعد أكيد بيدق هو قال لي انه بينتظر علي شوي...عطتني نظرات ما ادري وش تبي وقالت.. الحمد الله والشكر لحد يسمعك بس وبعدين لا تسوي روحك فاهم البنات لأنك ماعندك سالفة وفي شيء أبيك تفكر فيه تتوقع لو الوضع كان العكس خالد كان بيسامح وإلا بيسوي مثلك؟!!..وطلعت...وقعدت أفكر في كلامها واللي إجابته كانت واضحة بصراحة وهي بعد كانت تعرف الاجابه لان مواقف قديمه تبين إن خالد حتى لو كان صعبه عليه يسامح ومن النوع اللي زعله شين بس انه يسامحني أنا دايم مهما صار..لكن هالكلام مايهم الحين.. مر كم يوم وخالد للحين ما دق لكني يوم الأربعاء شفت ميه مس كول من طلال ورجعت أدق عليه قلت أكيد إن خالد يبيه يتوسط بيننا لأنه يعرف معزة طلال عندي لما فقد الأمل فيني , وبعدين اناخلاص وصلت عندي أبي كل هالسالفه تنتهي ودقيت وآنا فرحان...مرحبا طلال... هـ...هـ لا.. بندر..صوته أبدا ما عجبني واختفت الأبتسامه...طلال خير انشاءالله عسى ماشر,معليش ماكنت عند الجوال قبل شوي بغيتني في شي؟!... الرجال بدئ يتنهد وحسيت إن في شي مو زين صاير ...بندر أنا لي ساعة أحاول أدق عليك لكن ----....طلال ياخوك لا تلعب بأعصابي قلي وش فيكم؟!...إنا ذاك الوقت الهواجس لعبت فيني لعب قلت أبوهم توفى لأنه كان رجال كبير فالسن ومريض من زمان وإلا أخوهم الصغير تركي اللي كان عنده ربو حاد جاه شي, كل شي مر في بالي وكنت طول الوقت أفكر بس في خالد وشلون بيتقبل هالاشياء وأنا اعرف غلا أبوه وإخوانه عليه وعزمت إني أنسى كل اللي صار و أوقف معه في محنته كل هذا قبل لا ينطق طلال بحرف... خـالـد يا بندر-----!! لما سمعت الاسم حسيت إن قلبي وصل حلقي ولا عاد قدرت أتكلم أو حتى أتنفس,وبصعوبه...خـ-خـ--الد وش---فيه حراااااام عليك تكلم؟؟!! كنت انتفض وركبي ما عاد تشيلني... خالد يطلبك الحل يابندر ادع له بالرح---وخنقته العبرة,أما أنا فكنت ساكت,ولاعاد أشوف شي قدامي قعد يتكلم كلام ما فهمت منه شي اللي قدرت استوعبه انه الظهر صار له حادث والظاهر انه كان متوجه لبيتي وتوفى فالمستشفى...قفلت الجوال, كنت واقف وبحركه بطيئة قعدت على الأرض وبعدين انسدحت عالأرض وقعدت أناظر السقف لفترة طويلة ويدي على راسي فقدت الإحساس بكل اللي حولي, لا دموع ولا كلام ولا صدر مني أي ردة فعل.. طلعت بسيارتي امشي فالشوارع بدون هدى ما وعيت إلا أنا فالمجمعة ديره خالد اللي تبعد عن الرياض حوالي الساعتين وياما زرناها سوى, وقفت السيارة قدام فلتهم اللي يجونها أيام الشتاء، لما جا الليل رجعت للرياض.. دخلت البيت ورحت لغرفتي وقعدت أتقلب في فراشي تصوروا كل هذا بدون أي إحساس الظاهر إني ما كنت مستوعب المصيبة اللي أنا فيها, لما جا الصبح رحت لبيتهم على طول وقبل أوصل دق علي طلال... الو...هلا بندر, إذا ودك تسلم عليه وتودعه قبل الدفن تعال للمغسلة اليوم قبل صلاة العصر.. ما رجعت للبيت رحت للمغسلة وسألتهم قالوا ما بعد وصل من المستشفى, تبون الصراحة كان للحين عندي أمل إن السالفة كذب أو فيها غلط زي حال الكل وقت المصايب ماودهم يصدقون, واني بشوف خالد بعد شوي، قعدت عند الباب إلى الساعة 2,30والا أشوف سيارة إسعاف جايه ووراها سيارات إخوان خالد كلهم، وقف الإسعاف وفتحوا الباب الخلفي، شفت طلال وباقي إخوانه عند السيارة لما شفتهم يطلعون طرف شي ابيض شهقت ورحت اركض فالشارع, كنت أحاول ابتعد عن المكان بقد ما اقدر, مشيت لين وصلت أخر الشارع وجلست على رصيف واحد من البيوت, لما هدت نفسي شوي رجعت للمغسلة كان لازم أواجه الواقع لو كان قاسي.. ********************** (8) دخلت وآنا شماغي على كتفي وماسك عقالي في يدي وحالي دمار, لقيت مو بس إخوانه حتى أعمامه وأخواله وزوج أخته بعد، الكل كان متواجد, لما شافوني تغيرت وجيههم وحضنوني بحرارة, كلهم اعرفهم ويعرفوني زين عرفت إني ذكرتهم فيه لما شافوني حتى واحد من إخوانه ما رضي يتركني كنه بتعلقه فيني يحس انه مع أخوه خالد والغريبة إنهم كانوا يعزوني بدال ما أنا أعزيهم , المهم جاني طلال وعلامات التأثر باينه في وجهه..تبي ادخل معك؟؟؟إحنا تونا طالعين... قاطعته...لا لا بدخل لحالي... كانت هاذي أول جمله أنطقتها من أول ما دخلت للمغسلة حتى لما عزوني ما رديت عليهم.. تعوذت من إبليس وبديت اذكر الله و دخلت في الغرفة اللي دلوني عليها كانت فيها روايح غريبة الريحه اللي قدرت اعرفها هي ريحه المسك والصابون, الظاهر إن الرجال اللي كان فالغرفة هو المغسل, وقفت في مكاني عند الباب ماكنت عارف وش أسوي؟!! قرب جنبي و كان شخص يميل للقصر ,ابيض, لحيته طويلة وصاحب ملامح سمحة, حط يده على كتفي وحس بالرعشة اللي تهزني كنت أطالعه بنظرات استغاثة... وبصوت وقور قال...عظم الله أجرك ياولدي وأحسن الله عزاك ,الله يلهمكم الصبر والسلوان, قبّل جبهته وادع له بالثبات عند السؤال, وباللي يجي في بالك... كنت أطالعه وأنا اشهق بدون دموع وطلع من الغرفة.. شوي شوي قربت من عنده وشفت منظر في حياتي ما مر علي مثله, حسيت الدم وقف في عروقي لما شفته انهارت كل حصون المقاومة والصبر اللي بنيتها, ما ادري وشلون اشرح الوضع كانوا حاطينه على شي زي الطاولة ومرتفعه عن الأرض بمسافة قليله ,مغطين جسمه بشراشف بيضاء إلا وجهه وجزء من صدره, كانت عينه وجزء من جبهته متحولة للون الأزرق من فعل الصدمة أما خده ورقبته كانت فيها جروح بسيطة ,لكن واضح إن تركيز وقوه الصدمة كلها جت على صدره, كان زي اللي نايم بس بدون أي اثر للحياة والظاهر إني ما صدقت الخبر لين شفته بعيوني, فقدت أعصابي في ذيك اللحظات وصرخت صرخة مريعة، حضنته بين يديني وقعدت أصيح بحرقه زي الأطفال, دخلوا علي بعض إخوانه يوم سمعوا صوتي وحاولوا يأخذونه مني لكني كنت متمسك فيه بقوه.. يابندر قل لا اله إلا الله لا تسوي في نفسك كذا ترى ما يجوز...وأنا اصرخ من كل قلبي أحس إني فقدت عقلي للحظات... اتركوني خالد يا أخوك رد علي , كلمني ياخالد ,طلال خالد ليش بارد؟؟ليش تاركينه كذا؟؟ ليش ماغطيتوه؟؟ حرام عليكم... نزل رأسه وانسابت الدموع من عيونه...إنا الله وإنا إليه راجعون...تعال معي يا بندر تعوذ من الشيطان وخلنا نطلع...وأنا أحاول اكلمه..ياخوك وين رحت وتركتني؟!!أنا من لي غيرك ياخالد؟؟.. ودموعي سيول وإخوانه يحاولون يفكون يدي عنه.. وبعد جهد قدروا يأخذونه من بين يديني بعد ما بين اثر ضغطي على جسمه، وأنا منهار وفي حال مايعلم فيها إلا الله سبحانه, كل لحظه أنادي باسمه..جابوا لي كرسي وقعدوني عليه وأنا كني معهم ومو معهم... واحد من أخواله شيخ كبير من الناس اللي فيه خير وصلاح والله هاديهم قعد يمسح على راسي وصدري ويقرى علي قرآن لين هدت نفسيتي شوي ناظرت فيه...خالد صدق راح يا خال؟!...شد على يدي وهز رأسه ورجعت دموعي ويدييني على راسي وأنا أهز على الكرسي..مايصير يا خال والله ما يصير...قعد يستغفر وأنا على حالي، كنت مفجوع الله لا يفجعكم في حبيب... رحنا نصلي عليه كان المسجد مليان واللي برى أكثر من اللي داخل, كان الله يرحمه رغم صغر سنه إنسان محبوب من الجميع صغار وكبار, وفي المقبرة مع الزحمة وكل هالعالم اللي حولي إلا إني حسيت بوحدة رهيبة,كنت بعيد عن الجماعة ما أبي احد يعرفني أو حتى يشوفني رغم إني عارف إن الكل يسأل عني تلثمت بشماغي ولبست نظارتي الشمسية ووقفت بعيد عنهم. جاني تركي واللي كان له غلا كبير عند خالد بحكم انه الصغير وكان دايم يقول انه رغم صغر سنه إلا انه كان حكيم ويفهم اكبر من عمره بكثير, كان عمره تقريبا ذاك الوقت12سنه سلم علي وحضنته وأنا أحاول أتماسك قدامه ولكم إن تتصورون مقدار صعوبة الأمر خاصة انه يشبه خالد كثير قال لي:بندر خالد كان يعزك أكثر من أي واحد في هالمكان وكلهم مجتمعين حوله إلا أنت!!لا تتخلى عنه في هاللحظات عشان ما تندم باقي حياتك, تشجع وادع ربي انه يصبرك بس لا تحاول انك تهرب من أحزانك بهربك من هالموقف... كانت كلمات عظيمه أثرت فيني وشفت في هالطفل اللي فقد أخوه في حادث مفجع الصبر بمعناه الحقيقي,لميته لصدري مره ثانيه وكنا نواسي بعض بخسارتنا لكبيرة, مسكت يده وتوجهنا لهم...استعدوا للدفن وسمعت إخوانه ينادوني...قلت لهم إني أنا اللي بنزل فالقبر وأحطه ونزل معي واحد من إخوانه يساعدني...سلمونا إياه من فوق وحطبته وأنا ادعي له واذكر الله طول الوقت,كان ودي لو اجلس معه اوحتى أشوفه واسمع صوته لأخر مره لكن عرفت إن شمسي غابت خالد ((الرمت)) غاب من حياتي وهالحياه للأبد. |
|
|
|
04-29-2008, 09:11 PM
|
#3 |
|
أعضاء شرف
|
مشاركة: خالد وبندر الجزء الثاني
الله يعطيك العافيه ..
يا الغلا |
|
|
|
04-30-2008, 12:34 AM
|
#4 |
|
حاسبكو متابع
|
مشاركة: خالد وبندر الجزء الثاني
اشكرك يادفء المشاعر والله انك جابره خاطري
أول من يرد على مشاركاتي ..انت الله يجبر خاطرك .. لاعدمناك |
|
|
|
04-30-2008, 01:08 AM
|
#5 | ||||||||
|
مشتاقه لكم
|
مشاركة: خالد وبندر الجزء الثاني
جهوووووووووووود رائعه ياهدى
وقصه هااااااااادفه وحلوه مشكووووووووووووره ياقلبي |
||||||||
|
|
|
05-01-2008, 05:05 PM
|
#6 |
|
حاسبكو متابع
|
مشاركة: خالد وبندر الجزء الثاني
الله يحلي أيامك ياهمسات
مرررورك هو الأحلى لاعدمنااااك |
|
|
|
05-01-2008, 05:24 PM
|
#7 | |||||||
|
حاسبكو محترف جداً
|
مشاركة: خالد وبندر الجزء الثاني
جزاك الله كل خير وعافية
|
|||||||
|
|
|
05-02-2008, 12:39 AM
|
#8 | |||||||
|
مشاركة: خالد وبندر الجزء الثاني
قصه رائعه ياهدى
يعطيك الف عافيه |
|||||||
|
|
|
«
الموضوع السابق
|
الموضوع التالي
»
| يتصفح الموضوع حالياً : 1 (0 عضو و 1 ضيف) | |
العرض العادي
|
|
الساعة الآن 12:32 PM.
