الصدق : (قلب الحقيقه) يكسرضلوعه=الكذب : (قلب الحقيقه) وانت ماتدري ؟

ان ابتسامة سنون الحقد مصنوعه = واني مع اهل المثايل ماقصر شبري !

ان عشت شعري نهرماجف ينبوعه=وان مت ضامي وفا واعتب على شعري

والحب: شجره ورى المعلوق مزروعـه=ومحبة الوالدين وبرّهم فطري

لكنّ من طاح له في حب دلوعه=مشاعره في المحبه بثها حصـــــري

يمسي ويصبح وراسه متعبٍ كوعه=وان مره النوم مره طرقي وعبري!

بالذات لا كانت من الوقت مفجوعه=وانا الحميّه عليها شبت من صغري

ادعيك يالله عسى دعواي مسموعه=ترحمني برحمتك وتوسّع بقبــري

ارقام الاحزان فالشريان مطبوعه=والدم يجري ماهو داري بما يجري!

حتى المشاعر عن الخفاق ممنوعه=من كثر ما تكّت الضيقه على صدري

حاولت احايل خفوقٍ ماهدا روعه=وانسى الذي فات واهوّن على عمري

لو ان الافراح والاحلام مشروعه=من همي اللي طواني طي وش عذري .

ياصاحبي ياحصاد الهم واللوعـه=تحت امرك العام ولا اليوم تحت امري

اوجيه الآمال من فرقاك مصفوعه=ضايع وضيّعت مستقبلك ياصبري!

احبال رجواي في عودتك مقطوعه=تنزل دموع الملوك ولانزل قدري!!